热刺上「韦」在望

攻击手贝维恩已经成为热刺又一个新火力点

　　目前距离英超前四已经越嚟越远嘅热刺已经无太多失分空间，嚟紧礼拜三凌晨主迎更为落魄嘅韦斯咸，热刺岂会放过如此抢分良机，各位波友又点可以错过如此主标笋盘。

　　如果话热刺主帅摩连奴近期已经够烦恼嘅话，咁今仗对手韦斯咸嘅教头摩耶斯恐怕有过之而无不及。喺复赛前9轮仅得1胜嘅困境下，首战仍然未能痛定思痛，主场惨吞狼队两蛋。呢场失利，令到排名第17位嘅韦斯咸保组压力进一步增大。不过摩耶斯手上可用嘅牌实在唔多，曾经充满亮点嘅米查尔安东尼奥亦显得孤掌难鸣。相比之下，摩连奴今仗迎来攻击线大将迪利艾里解禁复出，而一复赛就有波入嘅荷兰攻击手贝维恩亦系热刺是役重返胜轨嘅一大保证。

　　喺人脚方面，热刺目前嘅3名伤患后卫祖安科夫、唐根加和锋线小将柏洛特都唔会对轮换人手上有太大影响。但韦斯咸就明显更为蚀章少少，三个后卫马苏亚古、奥邦拿、沙巴列达出战成疑，而中场辛迪加斯和射手贺拿嘅齐齐缺阵令到球队三线实力势必有所下降。