摩纳哥与祖记上演矛盾大战

 睇完马德里打比战之后，周四凌晨，又有另一场欧冠杯准决赛首回合上演，今季有唔少黑马成份嘅摩纳哥将坐镇主场迎战意甲班霸祖云达斯。摩纳哥今季将攻防快速踢法演绎得淋漓尽致，而祖记呢种意大利叠罗汉式防守亦难以贯穿，呢场比赛堪称为火星撞地球，一个强攻一个强守，矛与盾之战一触即发。

咪以为摩纳哥今届欧冠晋级历程轻松，十六强之后冇弱旅呢个讲法其实也不失为过，摩纳哥十六强嘅对手曼城、半准决赛对手多蒙特，两队都系近年欧冠赛场上嘅「风云人物」，喺同呢两队硬撼对攻战术嘅时候，摩纳哥将自己有速度有体能嘅特点完全发挥出来，4场比赛每场都射入3球，T.费宾奴、T.巴卡约高、贝拿度施华、汤马士利马以及麦巴比都系23岁或以下嘅球员，潜力十足之余能力方面绝对可以喺比赛中占据一定嘅优势，摩纳哥今季刮起嘅青春风暴确实不容小觑，一众后生仔可谓初生牛犊不怕虎，球队现时嘅冲击力堪称恐怖，球队今季喺各项赛事已经射入148球。另外，摩纳哥今仗还有1个优势，球队喺过去2次欧冠杯准决赛(包括未改制之前)主场都能够获胜，今仗可唔可以先拔头筹，就要看看摩纳哥嘅攻击手突唔突破到祖记后防线嘅包围。阵容方面，中场保舒利亚和前锋基度卡里路皆因伤倦勤。

两年前嘅德国柏林，老将派路泪洒欧冠杯决赛，失利让祖记当时明白依然需要喺欧战赛场卧薪尝胆。不过呢支来自文艺复兴嘅意大利球队，血液里流淌著犹如地中海般深邃嘅防守战术，佢哋让巴塞进攻始终处于「雾里看花」。反观艾历尼用一招文迪苏杰充当左中场便让巴塞右路防守拉响警报，最终亦成全小将迪巴拿「一战成名」。祖记用铁血防线防到巴塞开始「怀疑人生」，而且喺次回合中吸取圣日门遭遇折戟沉沙嘅前车之鉴，用比分证明意大利人嘅防线犹如比萨斜塔般坚固。莫问保方、捷连尼与邦路斯这三位年龄相加已达百岁嘅后防组合廉颇老矣尚能饭否，要知道老骥伏枥、志在千里，就系佢哋一次次将「MSN」嘅进攻化为乌有。保方职业生涯可谓荣誉无数，但唯独欧冠杯桂冠未有染指过，零封巴塞相信令到这位老将信心十足。自1989年以来，意甲球队每隔七年便称霸欧冠杯，期待今年老妇人嘅「七年之痒」。阵容方面，中场基迪拿停赛受罚；后卫路根尼和中场比积卡皆因伤缺阵。