宾菲加称雄「里」所当然

要数今季葡超发挥最为飘忽嘅球队，相信里奥阿维绝对可以获得提名，皆因佢哋此前啱啱经历连续5轮联赛不胜，但转过头又喺近4轮联赛中全取12分。不过里奥阿维嘅强劲势头如无意外将会喺礼拜四凌晨遭到终止，因为届时等待佢哋嘅将会系拥有魔鬼主场嘅一哥宾菲加。

其实里奥阿维阵中星光暗淡，球队近期能够接连称雄好大程度系依靠一众平民队友嘅同心协力，而目前联赛战罢14轮，里奥阿维有12位将士品尝过入波滋味亦足以证明佢哋整体实力不容小觑。但李斯特城奇迹并非时时有，而喺弱肉强食更加明显嘅葡超，里奥阿维今仗嘅拦路虎宾菲加更加如一座无法攀登嘅高山屹立在此。毕竟睇返宾菲加今季表现，抛开14轮联赛过后手握35分暂为一哥唔讲，球队跨赛季至今23场联赛主场录得20胜1和2负嘅战绩就足以吓死人。而且更加重要嘅系，目前积分榜阿二波图正喺身后穷追不舍，宾菲加今铺一旦取胜就将可以令双方积分差距扩大到较为安全嘅4分。试问毫无失分空间嘅宾菲加又点会放过送到埋嘴嘅里奥阿维。

不过即使阵中坐拥鲁尔占美尼斯、E.沙维奥等质素不俗嘅攻击手压阵，但睇返宾菲加过去4次联赛面对里奥阿维却往往入波唔多，其中有3场更加只能攻入1波。考虑到目前澳彩亚洲让球盘开出宾菲加主让球半/两球嘅盘口，今铺实在不得不防前者赢波输盘。