多蒙特欲攻陷汉堡

周六晚上，德甲第十轮继续有好戏上演，联赛副班长汉堡将坐镇主场迎战豪门多蒙特。近两季一直喺度挣扎嘅汉堡今季好似全面崩盘，前9轮联赛冇一场赢过，咁嘅表现想要喺多蒙特身上攞返自信心确实有难度。

就算汉堡近年主场面对多蒙特都占据上风，不过佢哋今时唔同往日，虽然阵中不乏令人耳熟能详嘅球员，后卫祖亚奥以及中场菲腊哥斯迪、贺治比都可以独当一面，但系足球系团体运动，领队拉巴迪亚喺带队攞到1和4负嘅开局成绩单之后，球会高层终于忍唔住要炒咗佢，依家嘅领队基斯度尔上任之后，球队都冇乜好转，最主要系呢班波实在太过散漫，各有各踢，根本唔似一个整体。再者，本以为德国杯第二圈取得1场大胜嘅汉堡可以藉此重回正轨，好遗憾嘅系，佢哋上轮净吞今季表现出色嘅科隆三蛋，再一次由天堂跌落地狱，阵中将士必然受挫。最为值得留意嘅系，汉堡今季除咗前锋波比活特之外，就好似冇人识入波，前9轮联赛汉堡就入过2波，都系呢位美国前锋贡献嘅，好可惜佢因为上一场攞到红牌，今场要停赛受罚，连阵中最强嘅攻击点都冇得上阵，汉堡今仗想唔输都几难。阵容方面，后卫史柏希锡因伤避战。

即使多蒙特阵中包括后卫舒美沙、中场施云宾达以及前锋马高雷斯等球员都因伤倦勤，但球队嘅班底厚度十足，真达引领后防线、韦高、干沙路卡斯特路同埋葛斯喺中场做调度，阿祖安拉莫斯以及奥士文迪比利呢D冲得跑得嘅球员喺前场冲锋陷阵，佢地嘅阵容依然可以做到进可攻退可守。而且多蒙特今季一如既往地展现攻势足球强大嘅一面，均场联赛可以斩获2.22个入波，汉堡条均场联赛失2波嘅后防线好大机会会被戏耍。另外，由于近期联赛不断失分，令到多蒙特已经落后榜首嘅拜仁慕尼黑8分，球队要继续威胁到拜仁，咁佢地必需要尽快振作，本轮走访副班长汉堡就正合多蒙特嘅胃口。投注方面，澳彩为呢场比赛开出上下盘分界线为2.5/3，两队近2次交手全场入球总数都喺3球或以上，以依家多蒙特咁强嘅攻击力对住汉堡好似厕纸咁一桶就穿嘅后防线，是役不妨落注上盘更为稳阵。