法國約戰俄羅斯

法國射手基斯文今仗盼繼續有好表現。

志在今夏歐國盃能夠係本土笑到最後的法國係禮拜三凌晨繼續馬不停蹄咁練兵，今鋪約戰的對手將係實力不容小覷的俄羅斯。論牌面主隊法國自然更勝一籌，但三線相當均衡的俄羅斯亦實屬硬骨頭，今鋪敲和或係合情合理。

其實睇返兩隊今期入選大軍名單，處於更新換代當中的法國依然算得上粒粒皆星，保羅普巴和基斯文兩位新攻擊核心就無需多講，而今季在英超火速冒起的中場簡迪及前鋒皮耶特亦逐漸上位。至於客軍俄羅斯本期大名單則變化不大，伊拿舒域治、森美杜夫及古沙哥夫等中後場老搭檔依舊在陣，對於同樣備戰歐國盃決賽週的他們而言，如今更多將係圍繞整體戰術作考慮。

雖然俄羅斯陣中星味略顯不足，但球隊向來勝在整體夠均衡，而且計埋今年法國歐國盃，他們已成該項賽事決賽週之常客，實力認真唔講得笑。相反法國攻擊力向來不成問題，但球隊如今後防線卻難算頂級，上仗國友賽面對新人當道的荷蘭亦兩度失波。而且更為不利的就係中堅華拿尼缺席了球隊在當地時間週日的訓練，原因更加暫時不明，今仗上陣頓時成疑。加上兩隊近年均少有交手，1場遭遇戰握手言和相信大家都會欣然接受。