水原三星火併大阪飛腳

攻擊好手宇佐美貴史(左)盼助大阪飛腳殺敵。

通常一到年頭，沉寂一排的亞洲賽場就開始鳴鼓開戰，不過東亞三強的聯賽就仲要等多陣，亞冠盃分組賽就適時可以幫各位波友解下渴。而今日在下就搵左場韓日大戰作心水推介，大阪飛腳將係禮拜三傍晚遠赴南韓挑戰水原三星。G組各隊整體實力相當接近，激戰可謂一觸即發。

由於一眾中國土豪球會在今年冬季轉會市場用一筆筆堪稱震撼人心的引援將所有人目光吸引住，導致以往在東亞做慣大佬的韓日球會如今受關注度顯著下降。而且礙於國內總體經濟環境不景氣，韓日球會如今基本都係精打細算，好似水原三星及大阪飛腳，兩隊今季在外援引進上均未有大動作，前者僅有鋒線新援H.施華稍為值得留意，而後者亦只有鋒線新血A.巴拉加比斯普稍具睇頭。班底基本無變的雙方如今更多仍然只係依靠隊內如中場權昌勛、遠藤保仁、宇佐美貴史及外籍射手A.柏德烈等舊有核心作爭勝資本。

睇返兩隊在上屆亞冠盃的表現，水原三星在十六強因作客入球的劣勢而遺憾被柏雷素爾淘汰；至於大阪飛腳則在準決賽被最後的王者廣州恆大阻擋去路，可以講，兩隊表現都絕不失禮。加上同處G組的球隊仲有墨爾本勝利及上海上港，在整體實力基本不相伯仲的情況下，想贏怕輸的心態隨時出現。何況分組賽首仗大家在未知對手真章的情況下通常都會踢得較為保守，今鋪韓日大戰一於捧和為妙。