金絲雀唔驚太妃糖到訪

前鋒格納班誓要為金絲雀攻擊線搵返季初嘅入球感覺。

英超第十六輪在週六晚上八點九率先展開1場角逐，保組份子諾域治將坐鎮主場迎戰中游隊伍愛華頓。過去10輪聯賽金絲雀只贏過1場，現在還同身處降班區域嘅紐卡素同分，搶分對於球隊來說已經刻不容緩，即使今仗面對近況尚可嘅太妃糖，金絲雀實會好似「餓狗搶屎」咁。

早前史雲斯解僱領隊蒙克，後者成為今季英超第四位被解僱嘅領隊，此舉為A.尼爾敲響了警鐘，唔想成為第五位失業嘅領隊，A.尼爾必須盡快帶領金絲雀返回正軌。金絲雀近6輪聯賽有多達3場食白果只攻入3球，不過睇下佢地嘅對手有阿仙奴、車路士以及曼城此等勁旅，咁又五怪得球隊表現糟糕嘅。而有一項數據證明金絲雀面對強隊時都無放棄比賽，就係面對上面所講嘅3支勁旅金絲雀都贏盤。不過近2仗聯賽都擔任正選嘅前鋒格納班要盡快為金絲雀攻擊線搵返入球感覺先可以保住自己嘅正選位置，所以上仗主場面對兵工廠有入波嘅佢今仗絕對不會腳軟。而早前金絲雀曾喺英聯盃第四圈作客挑戰太妃糖，當時球隊還一度將比賽拖到十二碼大戰，但最終飲恨被淘汰，陣中球員實會心有不甘，本輪回到主場迎戰太妃糖，搶分欲望強烈嘅金絲雀勢必以報仇為目標。陣容方面，只有中場查域斯因傷倦勤。

太妃糖擁有15場聯賽射入11球嘅盧卡古呢張王牌，喺佢帶領之下，球隊已經連續5輪聯賽保持不敗，當中射入15球。不過太妃糖過去3場聯賽作客都贏唔到波，最近1次作客還俾升班馬般尼茅夫「黑色10分鐘」導致有接近45分鐘時間領先2球嘅佢地最終只收穫1分。作客表現唔穩定始終係太妃糖嘅硬傷，球隊過去3次走訪金絲雀無一勝績，當中每場都被金絲雀入2球，後防最值得依靠嘅查積爾卡今仗繼續喺傷兵名單當中，加埋東尼希拔和布朗寧，宜家3位傷兵都係後衛，還有中場大將占士麥卡菲今仗同樣因傷無法出戰，領隊R.馬天尼斯確實要諗下計。