中央陸軍祿「卡」在望

中央陸軍攻擊手蘇蘭杜錫(左)側擊能力不俗。

今個禮拜中期歐洲主流國家都紛紛有國內盃賽上演，但往往強弱分明難有肉食，於是在下今日就劍走偏鋒，同大家推介返場係禮拜四晚上開波的俄超賽事，屆時對陣雙方分別為主隊安卡迎戰不懷好意的莫斯科中央陸軍。

歐冠盃確實極為考驗一班波的陣容厚度，喺俄超接近目中無人的中央陸軍近期亦在多線作戰中搞到自己周身蟻，不僅聯賽連續3輪不勝，歐冠中亦提前1輪宣佈出線無望。雖然他們目前仍有爭奪B組第三從而轉戰歐霸盃的可能，但低獎金低關注度的歐霸對於中央陸軍呢類豪門可以有幾吸引大家心照。喺聯賽領先優勢已經被蠶食到得返6分的情況下，渴望喺歇冬期前重新確立較大領先優勢的中央陸軍此行肯定要醒醒定定。至於主隊安卡近期亦相當唔好過，同樣3輪不勝的他們目前排名聯賽第十二，陣中星味嚴重不足的同時攻防兩端亦缺乏支柱型球員。加上安卡聯賽主場至今勝率只有33.33%，「一路生」就夠曬好意頭，但今鋪睇怕卻係死路一條。

睇返過往6次交手，中央陸軍贏足5場並唔出奇，但最為特別的當數他們係6場中有5場都至少攻入2球或以上，安卡防線喺中央陸軍面前簡直猶如提款機。與此同時，中央陸軍三大攻擊手蘇蘭杜錫、梅沙和杜姆比亞已經喺聯賽中「餓」了一段日子，此行面對難有抵抗之力的安卡，一場屠殺在所難免，開出上盤亦係絕無問題。