魯能迎戰舜天有冷味

舜天攻擊手孫可目前狀態有保證。

本年度中國足協盃爭奪已經進入到最為白熱化之階段，兩場準決賽首回合賽事都將於週三晚上打響，其中最為惹人關注噶肯定係山東魯能泰山主場約戰江蘇舜天，大家都渴望為晉級打下堅實基礎，一場腥風血雨在所難免。

由於聯賽冠軍及足協盃冠軍皆可直接獲得一席來屆亞冠正賽入場卷，在聯賽奪冠渺茫及保組基本無憂噶情況下，足協盃冠軍對於魯能及舜天兩者而言無疑於賽季遮醜布，雙方戰意肯定無需懷疑。但與舜天目前聯賽中基本可如例行公事般大打風流波唔同，目前聯賽暫列第四的魯能亦肯定心思思想殺入前三起碼確保一席亞冠外圍賽資格。但得一想二往往容易出事，畢竟在回合制盃賽中，球隊實力好多時反而係爭勝其次。

點解上面會咁講？其實睇返人腳，舜天當然唔差，中場吳曦、兩位攻擊手S.艾斯古迪路及孫可皆可獨當一面，其中孫可上輪聯賽剛剛有波入，狀態有保證。但主隊魯能陣中更加係粒粒皆星，既有領跑聯賽神射手榜噶前鋒S.艾萊斯奧所領銜噶攻擊線，亦有國門王大雷把關噶後防線。但學阿叔話齋：「波，係圓噶」，帳面實力只係參考，2004年NBA豪門湖人所組建之「F4」戰隊最終大熱倒灶足以成為體育屆之經典範本。今鋪首回合兩隊於山東上演決戰，與其跟風追大熱魯能，不妨追返注舜天揮軍殺敵，分分鐘可以過一個「肥仔」國慶。