紅軍全力捕捉金絲雀

前鋒賓迪基儲力擒「雀」。

週日深夜，英超第六輪好戲連場上演，其中一場賽事「紅軍」利物浦坐鎮晏菲路球場迎戰「金絲雀」諾域治。兩隊上一次交手已經是2013-14賽季，紅軍當時是近十年來狀態最好的時候，當賽季紅軍完成對陣金絲雀雙殺。不僅如此，近年8次交手紅軍總共錄得7勝1和，而對於此番送上門的「大餐」，紅軍今餐仲唔係實食無黐牙？

紅軍自從新賽季頭兩輪兩連勝之後未贏過波，目前5輪聯賽過後僅得7分，歐霸盃首輪分組賽又贏唔到波爾多，近期表現相當掙扎。大部分原因歸咎於傷兵太多，進攻乏力，5輪聯賽僅入得3波，紅軍一向引以為傲的攻擊力遭到質疑。幸好，紅軍迎來利好消息，據媒體報導，前鋒史杜列治和隊長亨達臣終於傷癒歸來，攻擊中場菲臘比古天奴亦都解禁復出，串聯起紅軍前場攻擊線的幾位重臣有望出山救主，還有最關鍵的主力前鋒賓迪基毫無疑問就是為了今仗擒下金絲雀所以歐霸盃被安排輪休。對於訪客是從未在紅軍身上吃到甜頭的金絲雀，紅軍誓必擒下「救命」3分。

金絲雀目前和紅軍同積7分，不過由於得失球優勢暫時排名靠前一位。上季幫助金絲雀重新殺返英超的中場大將巴特利莊遜今季離隊導致球隊實力有一定程度下滑，而幾乎原班人馬出戰新賽季的金絲雀此前5輪明顯暴露出引人詬病的問題，就係他們的防守，除去今季發揮令人大跌眼鏡的車路士和一向以魚腩見稱的新特蘭排名失球前兩位，緊隨其後的球隊之中就有金絲雀份。今仗金絲雀作客晏菲路球場，唔好話作客了，就算在卡諾路球場都無人信會贏到紅軍。雖然話歷史只係具有參考價值，但眼前紅軍終於迎來多名主力歸隊，金絲雀想無穿無爛飛出晏菲路球場睇怕只係妄想。陣容方面，後衛韋斯頓從紅軍租借過檔，面對母隊不能上陣，中場梅林布和前鋒加利賀柏因傷缺陣。